Marcellus consul Boiorum fines ingressus est. Cum milites, itinere totius diei fatigati, castra in tumulo ponerent, Corolamus, regulus Boiorum, cum magna manu Romanos adortus est et circiter tria milia hominum occidit. Castra tamen ab Romanis impigre permunita retentaque sunt, cum hostes, prospera pugna superbi, ea nequiquam oppugnavissent. Inde Boi in castella sua vicosque passim dilapsi sunt. Marcellus per dies aliquot in castris moratus est, ut et saucios curaret et a tanto terrore animos militum reficeret; postea, cum Padum confestim transgressus est, idem in agrum Comensem, ubi Insubres castra habebant, legiones duxit. Galli in ipso itinere proelium committunt et primo acriter impetum fecerunt. Quod ubi Marcellus animadvertit, cum suos milites pulsum iri censeret, equitum Latinorum omnes turmas in hostem emisit. Cum eorum impetus Galli reppulissent et reliqua acies Romana primum restitisset, deinde eos acriter adorta esset, Galli certamen ultra non sustinere ausi sunt, sed terga verterunt atque a proelio effuse fugerunt. Castra Gallorum eodem die expugnata direptaque.
- Latino
- Lingua Viva 1
- Versioni dai Libri di Esercizi
