Neptunus et Aegaeus Pandionis filius in fano Minervae cum Aethra, Pithei filia, una nocte concubuerunt. Neptunus quod ex ea natum esset Aegeo concessit. Is autem, postquam a Troezene Athenas redibat, ensem suum sub lapide posuit et praecepit Aethrae ut tunc eum ad se mitteret cum posset eum lapidem adlevare et gladium patris tollere; ibi fore indicium cognitionis filii. Itaque postea Aethra peperit Theseum; qui ad puberem aetatem cum pervenisset, mater praecepta Aegei indicat ei lapidemque ostendit ut ensem tolleret et iubet eum Athenas ad Aegeum proficisci eosque qui itineri infestabantur omnes occidit. Corynetem, Neptuni filium, armis occidit et Pityocamptem qui gradientes cogebat et secum arborem pinum ad terram flecterent. Quam qui cum eo prenderat, ille eam viribus missam faciebat; ita ad terram graviter elidebatur et periebat. Procrustem Neptuni filium interfecit: ad hunc hospes cum venisset, si longior esset, minori lecto proposito, reliquam corporis partem praecidebat; sin autem brevior statura erat, lecto longiori dato, incudibus suppositis extendebat eum usque dum lecti longitudinem aequaret. Scironem, qui ad mare loco quodam praerupto sedebat et, qui iter gradiebatur, cogebat eum sibi pedes lavare, et ita in mare praecipitabat, hunc Theseus pari leto in mare deiecit, ex quo Scironis petrae sunt dictae.
- Latino
- Le Fabulae di Gaio Giulio Fedro
- Igino
