Contra Veientanos qui rebellaverant dictator missus est Furius Camillus qui primum eos in acie vicit deinde etiam civitatem diu obsidens cepit antiquissimam Italiae atque ditissimam. Post eam cepit et Falerios non minus nobilem civitatem. Sed postea contra eum commota est invidia quasi praedam male divisisset damnatusque ob eam causam et expulsus civitate est. Paulo post Galli Senones ad Urbem venerunt et apud flumen Alliam exercitu Romano profligato victos hostes insecuti etiam urbem occupaverunt. Nihil defendi nisi Capitolium potuit. Sed audita suorum clade supervenit Camillus qui in vicina civitate exulabat gravissimeque Gallos vicit et eos insecutus ita cecidit ut et aurum quod iis datum fuerat et omnia militaria signa que ceperant remittere coacti sint.
- Latino
- Breviarium ab Urbe condita di Flavio Eutropio
- Eutropio
