Parte altera pugnae Paulus, quamquam primo statim proelio funda graviter ictus erat, tamen et occurrit saepe Hannibali cum
militibus confertis et aliquot locis proelium restituit. Cn. Lentulus, tribunus militum, cum, praetervehens equo, consulem
sedentem in saxo cruore oppletum vidisset: “L. Aemili – inquit – quem unum insontem culpae cladis hodiernae dei respicere
debent, cape hunc equum, dum et tibi virium aliquid superest et comes ego te tollere possum ac protegere. Ne funestam hanc
pugnam morte consulis feceris”. Ad ea consul: “Tu quidem, Cn. Corneli, macte virtute esto: sed cave ne, frustra miserando,
exiguum tempus e manibus hostium evadendi absumas. Abi, nuntia publice patribus ut urbem Romanam muniant ac praesidiis firment.
Memet in hac strage militum meorum volo exspirare, ne aut reus puter aut accusator collegae exsistam, ut alieno crimine
innocentiam meam protegam!”.
- Latino
- Versioni di Marco Porcio Catone
- Livio
