Post L. Verum M. Antoninus solus rem
publicam tenuit, vir facile laudabilis. A principio vitae tranquillissimus fuit: nam ex infantia notum est quoque vultum nec ex
gaudio nec ex maerore eum mutavisse. Didicit philosophiam per Apollonium Chalcedonium, scientiam litterarum Graecarum per
Sextum Chaeronensem, Plutarchi nepotem. Scimus autem ei Latinas litteras Frontonem, oratorem nobilissimum tradidisse. Hic cum
omnibus Romae aequo iure egit, nullius insolentiae fuit, liberalitatis promptissimae. Provincias ingenti benignitate et
moderatione eum constat tractavisse. Contra Germanos hic princeps res feliciter gessit; bellum ipse unum gessit
Marcomannicum: rerum scriptores autem adfirmant hoc bellum sine ullo dubio non minus memoria dignum fuisse quam bella Punica.
Sub M. Antonino tradunt pestilentiam fuisse; post victoriam Persicam Romae ac per Italiam provinciasque maximam hominum partem,
militum omnes fere copias dicunt languore defecisse.
- Latino
- Breviarium ab Urbe condita di Flavio Eutropio
- Eutropio