Philippus, Macedonum rex, ubi primum famam accepit Hannibalem Alpes transgressum, ut bello
inter Romanum Poenumque orto laetatus erat, ita utrius populi mallet victoriam esse, incertis adhuc viribus, fluctuatus animo
fuerat. Postquam tertia iam pugna victoria cum Poenis erat, ad fortunam inclinavit legatosque ad Hannibalem misit, qui per
Apuliam petentes Capuam media in presidia Romana illati sunt deductique ad Valerium Laevinum praetorem, circa Luceriam castra
habentem. Ibi intrepide Xenophanes legationis princeps a Philiuppo rege se missum ait ad amicitiam societatemque iungendam cum
populo Romano; mandata habere ad consules ac senatum populumque Romanum. Praetor inter defectiones veterum sociorum nova
societate tam clari regis laetus admodum hostes pro hospitibus comiter accepit: itinera cum cura demonstrat et quae loca
quosque saltus aut Romanus aut hostes teneant. Xenophanes per praesidia Romana inde in castra Hannibalis pervenit foedusque cum
eo atque amicitiam iungit.
- Latino
- Versioni di Marco Porcio Catone
- Livio
