Caesar, exposito exercitu et loco castris idoneo capto, ubi ex captivis cognovit quo in loco hostium copiae consedissent, cohortibus decem ad mare relictis et equitibus trecentis, ut praesidio navibus essent, de tertia vigilia ad hostes contendit, cum in litore ad ancoras naves deligatas reliquisset. Eis navibus Quintum Atrium praefecit; Ipse, noctu progressus milia passuum circiter duodecim, hostium copias conspicatus est. Illi, equitatu atque essedis ad flumen progressi, ex loco superiore nostros prohibere et praelium committere coeperunt. Repulsi ab equitatu se in silvas abdiderunt, locum nacti egregie natura munitum, quem domestici belli causa iam ante praeparaverant: nam, crebris arboribus succisis, omnes introitus erant praeclusi. Ipsi ex silvis rari propugnabant nostrosque intra munitiones ingredi prohibebant. At milites legionis septimae, testudine facta et aggere ad munitiones adiecto, locum ceperunt eosque ex silvis expulerunt, paucis vulneribus acceptis.
- Latino
- De Bello Gallico
- Cesare
