Dum longius a munitione aberant Galli, plus multitudine telorum proficiebant; posteaquam
propius successerunt, aut se ipsi stimulis inopinantes induebant aut in scrobes delati transfodiebantur aut ex vallo ac
turribus traiecti pilis muralibus interibant, multis undique vulneribus acceptis nulla munitione perrupta, cum lux appeteret,
veriti ne ab latere aperto ex superioribus castris eruptione circumvenirentur, se ad suos receperunt. At interiores dum ea quae
a Vercingetorige
ad eruptionem preparata erant proferunt, priores fossas explent, diutius in his rebus administrandis morati
prius suos discessisse cognoverunt quam munitionibus adpropinquarent. Ita re infecta in oppidum reverterunt.
- Latino
- De Bello Gallico
- Cesare
