Versione tradotta del Bellum Catilinarium: Paragrafo 3
Sed in magna copia rerum aliud alii natura iter
ostendit. Pulchrum est bene facere rei publicae etiam bene dicere haud absurdum est; vel pace vel bello clarum fieri licet; et
qui fecere et qui facta aliorum scripsere multi laudantur. Ac mihi quidem tametsi haudquaquam par gloria sequitur scriptorem et
auctorem rerum tamen in primis arduom videtur res gestas scribere: primum quod facta dictis exequenda sunt; dein quia plerique
quae delicta reprehenderis malevolentia et invidia dicta putant ubi de magna virtute atque gloria bonorum memores quae sibi
quisque facilia factu putat aequo animo accipit supra ea veluti ficta pro falsis ducit. Sed ego adulescentulus initio sicuti
plerique studio ad rem publicam latus sum iique mihi multa adversa fuere. Nam pro pudore pro abstinentia pro virtute audacia
largitio avaritia vigebant. Quae tametsi animus aspernabatur insolens malarum artium tamen inter tanta vitia inbecilla aetas
ambitione corrupta tenebatur; ac me cum ab relicuorum malis moribus dissentirem nihilo minus honoris cupido eadem quae ceteros
fama atque invidia vexabat.
- Latino
- Bellum Catilinarium
- Sallustio
