Sed ea tempestate
coepere se quisque magis extollere magisque ingenium in promptu habere. Nam regibus boni quam mali suspectiores sunt semperque
iis aliena virtus formidulosa est. Sed civitas incredibile memoratu est adepta libertate quantum breui creuerit: tanta cupido
gloriae incesserat. Iam primum iuventus simul ac belli patiens erat in castris per laborem usum militiae discebat magisque in
decoris armis et militaribus equis quam in scortis atque conviviis libidinem habebant. Igitur talibus viris non labor insolitus
non locus ullus asper aut arduos erat non armatus hostis formidulosus: virtus omnia domuerat. Sed gloriae maximum certamen
inter ipsos erat: se quisque hostem ferire murum ascendere conspici dum tale facinus faceret properabat. Eas divitias eam bonam
famam magnamque nobilitatem putabant. laudis auidi pecuniae liberales erant; gloriam ingentem divitias honestas volebant.
memorare possum quibus in locis maximas hostium copias populus Romanus parua manu fuderit quas urbis natura munitas pugnando
ceperit ni ea res longius nos ab incepto traheret.
- Latino
- Bellum Catilinarium
- Sallustio
