Occurrebat ei mancam ac debilem praeturam futuram suam consule Milone: eum porro summo consensu populi Romani consulem fieri videbat. Contulit se ad eius competitores sed ita totam ut petitionem ipse solus etiam invitis illis gubernaret tota ut comitia suis ut dictitabat umeris sustineret. Convocabat tribus se interponebat Collinam novam dilectu perditissimorum civium conscribebat. Quanto ille plura miscebat tanto hic magis in dies convalescebat. Ubi vidit homo ad omne facinus paratissimus fortissimum virum inimicissimum suum certissimum consulem idque intellexit non solum sermonibus sed etiam suffragiis populi Romani saepe esse declaratum palam agere coepit et aperte dicere occidendum Milonem.
- Latino
- Pro Milone di Marco Tullio Cicerone
- Cicerone
